Świętochłowice - Forum bez polityki

Idzie to tyż posuchać na www.ojgyn.blog.onet.pl

Na co użôlajóm sie nôjbarzij polske turisty? Anó, cheba na wszyjsko, co ino jes myjglich. Dóm Wóm sam dzisiôj ino pôrã przikłôdów na wajanie turistów.
To bóło bez dwadzieścia lôt tymu nazôd, kiej my ze mojóm Elzóm wykludziyli sie na wywczasy do Tunezyji, a ta szumnô i fajnistô miyjscowość kaj my byli, mianowała sie Al-Monastir kole srogigo portu Sousse. Kiejsik na łodwieczerz zicli my sie we hotylowym barze kole takij hormiji polskich turistów. My sie tam ze mojóm staróm blank niy łodzywali, ale te kamractwo wedle nôs, kiere dosik już sie wysłepało, napoczło ci terôzki na przebiyżki łozprawiać, co i fto takigo srogigo widziôł abo zmachlowôł. To wszyjsko szło by jesce szczimać, ale znod sie jedyn taki nabańturzóny, kiery ci na wszyjsko żelómbôł i molyndziół, wszyjsko mu sie niy zdało, wszyjskimu niy bół rôd. Kiej wszyjskie naobkoło łozprawiali ło swojich przigodach, ino łón jedziny napocznół wajać, iże skuli takij maluśkij ino fóncli we jejigo izbie, bóło mu na łodwieczerz tak festelnie ćma, co mu sie blank wszyjsko popśnióło i miast do haźlika, wlôz ci łón do hotylowygo szranku i jesce ku tymu prasknół palicóm ło rant i terôzki miôł festelnô ojla na czole.
Inkszóm razóm bóła ci snami na wywczasach (bóło to Majorce) jedna angyjbera kajsik spodle Czynstochowy, kierô zawdy wandrowała po świycie ze swojim psiôkiym. Kiejsik przi łobiedzie wkarowało do hotylowygo restaurantu i już łod proga wrzescała choby jóm fto ze skóry łobdziyrôł:
– Ludzie, kaj sam jes jako łochróna, kaj sam sóm ludzie, kierzy majóm sie starać łó nôs, ło turistów i jejich dinkse, kiere ze sia na wywczasy przismycyli?
– Poleku paniczko, poleku – krochmala ci ji opaternie. – A cóżesz tyż takigo wóm sie stało, iże tak larmujecie na côłki karpyntel i szterujecie sam ludzi przi łobiedzie?
– Co sie stało? Co sie stało? – napoczła sie jónkać ze złóści i porwała ci sie na mie. – Widziôł to fto, widziôł! Mojigo psiôka, mojigo „pekincyka” kciała ci zeżrić... myjwa... srogo choby adler!!!
Kiej indzij byli my ze mojóm Haźbiytkóm we Egipcie. Bez dwa tydnie miyszkali my we szykownym hotylu (miana już niy bocza) jakiesik kielanôście kilomyjtrów łod samyj Aleksandrii we takij miyjsówości Hannoville. Tam ci juzaś bóła snami pôrã łoszkliwców, a nôjgorszyjszy bół jedyn móndrok, kiery bezmać wszyjskie filipy pozjôdôł i wszyjsko go tam szterowało. Nôjprzodzij tracióła mu sie gorzôła we jejigo izbie. Pewnikiym miół ci pierónych słabo palica i niy pamiyntół na drugi dziyń wiela na łodwieczerz wysłepôł, abo już taki bół łoszkliwiec-rasista, co zawôdzali mu ludzie ćmawe, abo blank czôrne.
Skuli niygo dyrechtor hotylu wyciep by ze roboty jednego Arabera, kiery nóm bedinowôł, bo tyn istny dôł skôzać, iże tyn razinku Araber wysłepôł mu pół halby naszyj polskij gorzôły. Niy miarkowôł tyn gupielok, iże tymu Araberowi religijô niy dozwôlała słepaniô gorzôły. Ale to bół jesce maluśki pinkel. Kiejsik kôzôł zawołać naszygo „pilota” (bół to fest wysztudowany chop, Mr. Mamnun Sadek) i napocznół jamrować, wajać i wynokwiać, iże mô pierónym daleko do morza. Jes ci te morze łoddalóne barzij niźli to bóło na fotografiji we foldyrze. I nic ci mu sie szło wytuplikować, co to jes dwa razy bez dziyń skuli odpływu i przipływu morza. Uwzión sie, co bydzie sie szprajcowoł we naszym „Orbisie”. Jednymu juzaś inkszymu łochyntolowi we Sienfuegos na Kubie zawôdzali na isto szykowne, wizgyrne ajdeksy, kierych wszandy bóło połno. I blank ci łóne żôdnymu niy zawôdzali, a szło ci na nie zazierać godzinóma.
Kiej sie cowiek wykludzô do takich krajów jak Egipt, Indie, na modno terôzki Dominikana abo kajsik jesce we inksze gorke kraje, to trza tyż być zawdy na to narychtowanym, iże bele kaj trefić idzie na mozgole, szwoby i rusy. Tak ci tam już jes i nic na to niy idzie poradzić. Alech trefiółech tyż już na takigo, kiery na łodwieczerz, już po cmoku wkarowôł do hotylowego baru we Soczi na Krymie i wreszczôł na côłki karpyntel:
– Ludzie! Ludzie, u mie we izbie sóm szwoby sroge choby lyjwy!!!
Pokôzało sie niyskorzij, co to byli dosik sroge kopruchy ale tyn cielepa niy dôł sie tego pedzieć i dalszij jamrowôł, aże mu dali inkszô izba tela... co jesce barzij zabłechanô.
Nojbarzij (nó, tu by sie szło wadzić ło Polôków) to ale wyrobiajóm kajsik we cudzym kraju Ynglyndery. Łónym, i jesce możno ino nowym-ruskim, zawôdzô na isto wszyjsko. Nôjbarzij to, co żôdyn niy kce gôdać po ynglicku. Łónym sie zdô, co wszyjske muszóm – tak jak we jejich dôwniyjszych kolóniach – na zicher gôdać po ichniymu. I kiejsik tyż uwidziôłech we szykownistyj, sztramskij kafyji we Paryżu jak jedyn ryży Ynglynder dugoł, przisrôwôł francuskij kelnyrce, iże łónego i jejigo kamratów przinoleżi uważować po królewsku. Łóna poleku, blank ze rułóm łodpedziała mu:
– A miarkujecie panoczku, co my Francuze robiyli swojim królóm ...???
I tu ci go sztopło, i blank już niy bóło mu nic do śmiytchu.
Jô juzaś nôjrodszij spóminóm moje (i mojij Haźbiytki) wywczasy na Cyprze. Już terôzki niy bocza eźli to bóło we Limmassol abo we takij dziydzinie Ayia Napa (hotel ale mianowôł sie Aeneas) kaj na isto przikludzali sie sroge hormije tych nowych-ruskich. Śniymi to bóło drugda na isto mocka uciychy.
Kiejsik gawca sie tak na pôruch tych ruskich i suchóm, a jedyn śnich gôdô:
– На чмо у меня нож и випка?
– А на чмо, на чмо ... – napoczynô tuplikować jejich pilótka. – Пoтoму чтобы обедатъ, ужинатъ!
Pilótka wyeklerowała co potrza, karlus pokroł jôdło i... wećkôł ci to wszyjsko palcyskóma. Dwa razy ci mu sie hepło, łoblizôł jesce talyrz i na łostatek wrzescy choby nôjynty:
– A хлебный квас у вас естъ ?
Prziszôł grecki óber i opaternie mu raji, coby sie chop szluknół ichniygo wina abo metaxy, ale tyn ryl ino wrzeszczy, iże co to za kóltura, kaj sie łóni chowali. I take tam jesce inksze pierdoły.
Tak sie miarkuja, co i u nôs sóm take dudroki i ryle, i jes jich na isto corôzki wiyncyj wszandy, tak, iże jô już pôrã lôt tymu nazôd, gańbiółech sie prziznać kajsik we świycie, co jô jes Polôk. I ino sie cowiekowi jscać kce, kiej mô do czyniyniô ze takimi soróniami.

_________________
Ojgyn z Pnioków