Idzie to tyż posuchać na
www.ojgyn.blog.onet.plWe tym marcu to jes na isto szpasownie. Bo to i „Dziyń Kobiyt”, i taki fajer świyntygo Patricka, nō i fajruje świynty Jōzef. A na łostatek jes jesce i piyrszy dziyń wiesny, chocia latoś to mi sie zdǒ, co to tego dnia niy bydzie; możno ino we kalyndǒrzu. Nale, kiejech sam już spōmniǒł tego świyntygo Patryka, to trza by ździebko sam łō niym pedzieć. Sōm take miana, kiere fajruje sie na cǒłkim świycie. Jes to pewnikiym Mikołǒj, Walynty (chocia jǒ tych blank iptowatych „walyntynek” festnie niy ciyrpia) i Patryk. U nǒs już tyż corǒzki wiyncyj sie te świynto fajruje, bo to i przeblykanie sie za bele co, i słepanie piwa, a Irlandczyki tyż, kierzy – krōm whiskey, i niy jes to fyjler, bo ino szkocko gorzǒła mianuje sie whisky – majōm niy gorszyjsze piwa niźli my. Irlandczyki, tak nikiej Polǒki sōm na cǒłkim świycie. I gǒdǒ sie, co we tego świyntygo Patryka „everyone’s Irish” – znaczy wszyjskie ludzie to sōm na isto Irlandczyki. Tak, jak to naszym politykierōm sie zdǒ, co wszandy sōm Polǒki i ino łōnych majōm we zocy. Fto to bōł tyn świynty Patryk? Anō – jak gǒdajōm – bōł to irlandzki apostel, kiery tak po prǒwdzie pochodziōł ze Szkocji lebo Bretanii. Bez duge lata bōł ci łōn heresztantym, ale już we 432 roku łostǒł biskupym a dǒwniyjszy Łojciec Świynty wykludziōł go do Irlandii. Te ichnie irlandczyki to byli ludzie, kierzy ciyngiym żyli miyndzy celtyckimi bogami i we – jak to sie gryfnie gǒdało – pogōńskich łobrzyndach. Eźli tyn nasz Pōnbǒczek sie tam przijmnie, to wtynczos żǒdyn niy poradziōł na zicher pedzieć? Tyn misijōnǒrz uholkǒł wodza tych ludzi a niyskorzij, we 445 roku, wystawiōł piyrszy ci tam kościōł. I kole tego kościoła napoczli bajstlować gryfne miasto Armagh, kiere bez cǒłke szejśćset lǒt bōło biskupowe. Trza jesce dopedzieć, co we V wiyku ta Irlandia przijyna krześcijaństwo, a gynał siedymnǒstygo marca napoczli ludzie fajrować dziyń św. Patryka. Łod tego tyż czasu (a możno i ździebko niyskorzij?) bōł to gryfny fajer kiej bajstlowali take „zielone parady” i festelnie słepali jejich zielōne piwo. I Wiycie, chocia we Polsce, i sam u nǒs na Ślōnsku, żǒdyn tego niy miarkowǒł, łod jakisik pǒruch lǒt i u nǒs tyn fajer jes, ludzie słepiōm fest to jejich piwo, przeblykajōm sie na zielōno; bali i kudły – nikiej tyn pofyrtany jedyn śpiywǒk – farbujōm na zielōno i po jednych pijōndzach – bali i fresy. Możno to i gryfnie? Nale, kuknijcie ino. My mōmy tela roztomajtych zwykōw a żǒdyn tak na isto niy poradzi ze tego zbajstlować gryfny gyszeft, coby i inksze ludzie, ze cǒłkij Ojropy, sam do nǒs sie przikludzali, coby betki, te moderne „euro” łostawić. My sie ino poradzymy na fest wadzić a pijōndze... a pijōndze, to nōm możno tyn nasz świynty Mikołǒj wciepnie bez szlot jak bōmba do dǒwnygo luftszuckelera bez łostatnio wojna. Ale, to kej indzij.
Zaloguj się
Zarejestruj się
FAQ
Szukaj
