| Świętochłowice - Forum bez polityki https://forum.swietochlowice.biz/ |
|
| Ida do szynku... https://forum.swietochlowice.biz/viewtopic.php?f=17&t=173 |
Strona 1 z 1 |
| Autor: | Ojgyn z Pnioków [ 31 sty 2014, 10:06 ] |
| Tytuł: | Ida do szynku... |
Idzie to tyż posuchać na www.ojgyn.blog.onet.pl Rółzczasu jedna pôra bóła zarôzki po żyniacce – dwa tydnie skorzij mieli wiesieli. Chop, po prôwdzie festelnie przôł swojij babeczce, ale prziszło mu smacysko, coby trefić sie ze swojimi starymi kamratami i deczko śniymi pobalandrować we jejich umiyłowanym szynku. Napocznół sie łoblykać do wyjńściô i gôdô opaternie do swojij babeczki: – Wiysz ty moja roztomiyło, jô terôzki wylazuja, ale niydugo wróca nazôd. – A kaj tyż to lejziesz, mój ty roztomiyły chopeczku? – spytała sie ta jego babeczka. – Anó, miarkujesz, ida do szynku, moja ty świyrgołuszko. – Kciôłbyś możno piwa, mój ty roztomiyły chopeczku? – spytała sie baba i podlazła ku kilszrankowi, łozewrziła dźwiyrze i pokôzała mu zamlóng, côłkô kolekcyjô 25 zortów piwa ze roztomajtych dziedzinów. Chop sztopnół festelnie zdymbiôły i jedzinie, co poradziół ze sia w tym łoka mrziku wyszwargotać, to tela: – Ja, ja, mój ty bómbónku słodziuśki... ale we naszym szynku.... nó wiysz, miarkujesz... te łoziómbióne zajdle... Niy nastyknół jesce wszyjskigo wypedzieć, kiej jego babeczka mu przerwała: – Kciôłbyś do piwa łoziómbiónô kufa? Niy ma problymu. Wyjyna ze jejich kilszranku srogachny, mocka wyziómbióny zajdel do piwa. Ale chop, deczko blady już ze wrażyniô, niy dôwôł za wygranô: – Nó ja, mój skarbyńku, ale we naszym szynku majóm take na isto szykowne, szmektne przidôwki, szpajzy... Niy byda tam dugo. Wróca naprôwdy wartko – łobiycuje chop. – Môsz szkrabka, smacysko na jakiesik przidôwki ku piwie, mój ty misiôczku roztomiyły? – Baba łozewrziła dźwiyrze szrancka a tam nasztaplowane: słóne paluszki, łorzyszki, chipsy, parszczóne krzidełka, pokrónô szołdra, marinówane lisówki i szampiniôki i mocka jesce inkszych maszkytów. – Ale, moja ty roztomiyło... we tym naszym szynku... wiysz... nó, miarkujesz... te wszyjske chopske łozprôwki, sklinanie, jak to miyndzy chopami... – Kciôłbyś sklinaniô, mój ty dziubecku? Nó tóż słepej te twoje kurewskie piwsko ze tego jebanego łoziómbiónego zajdla i żrij te pierdolóne przidôwki! Jeżeś giździe terôzki żyniaty i nikaj łochyntolu kurwa niy pójńdziesz! Spokopiółeś to yntlich skurwysynie? Mój ty nôjmilyjszy! |
|
| Strona 1 z 1 | Strefa czasowa UTC+1godz. |
| Powered by phpBB® Forum Software © phpBB Group https://www.phpbb.com/ |
|