| Świętochłowice - Forum bez polityki https://forum.swietochlowice.biz/ |
|
| Pozór przi wieśnie... https://forum.swietochlowice.biz/viewtopic.php?f=17&t=221 |
Strona 1 z 1 |
| Autor: | Ojgyn z Pnioków [ 06 kwie 2014, 9:02 ] |
| Tytuł: | Pozór przi wieśnie... |
Idzie to tyż posuchać na www.ojgyn.blog.onet.pl Nó, tóż mómy już łod dwióch tydni na isto wiesna. Kiejsik gôdali takô powiarka: „I wiesna by nóm tak niy smakowała, kiejby przodzij zimy niy bóło.” Nale, mielichmy latoś jakosik zima samtukej u nôs? Blank, ale to blank zimy niy bóło. Ku tymu jesce i dyszcza tyż jakosik mało we lutym i marcu bóło, tak, iże te, co majóm gryfniste zegródki, tropiyli sie eźli jim cosik sie tam podarzi, cosik tam na tyj suchyj ziymi wyrośnie. I gryfnie prosiół mój kamrat Bogdan Dzierżawa (mianowany Utopkym) we takich sztrofkach: „Polyj dyszczu, polyj Mocka cie tu trzeba, Bo jak niy polejesz, To zabraknie chleba. Yno zaś tak niy lyj Choby fojermany, Bo tyn biydny pampóń Fest jest już "spłókany". I Wiycie, Wy moje roztomiyłe suchôcze, zawdych wajôł, iże niy poradza znojść sztrofek po naszymu, po ślónsku. Terôzki znodech gryfnisty wierszyk, i zarôzki go Wóm tyż powia. Musza ale rzyknóńć, iże napisôł go mój kamrat ze Rudy Śl. Brónek Wątroba. Mianujóm sie te sztrofki: Kiej gyńsipympek. „Kej gyńsipympek rozkwitô wiosnom Kej mojik żółci łónki swym kwiyciym Herske uczucia we sercach rosnóm We dyszach fakla grzeje i świyci. Frelki bez mantlów już w swoji krasie Kajniykaj słonko chalo promykóm Karlusom ździybko haltować trza sie Dyć jak te cuda łominóńć blikym? Jako natury prowu łopiyrać? Ciała sóm gorke i dusze - wiym to Mô szac na lipsta yno zazierać? Ło świynty Jonie - som byś zaślimtoł! Ech - lato idzie, ze nim spełniynie Kupluje dusze, ciału folguje Natura zdô sie dać jedne tchnienie Kto pszôł, kto pszaje - to forszteluje. Toż niy na darmo - pewnikym wiycie Tako Ponboczek zocnie świat stworzył Coby rodziło na nim sie życie - Zawdy po zimie na nowo ożół. Kej gyńsipympek wiosnóm rozkwitô Kej mojik kwieciym zażółci łónki Bociek w tym czasie dyć tyż zawitô Na ciôsto życia wystyknie mółki.” Nó ja, śniygotki, gynsipympi, mojiki, narcizle i co tam jesce napoczli kwiść, tóż tyż już na zicher wiesnóm wóniô, Prôwda? Nale, tyż na wiesna jes tyż srogachnô utropa. Utropa ze wypolaniym trółwy i inkszego chaboziô. Toż to jes łod gryfnych kielanostuch lôt na isto jakosik zaraza. Jakisik gupielok kiejsik wypokopiół, co na takim spôlónym lepszij sie wszyjsko uplóncnie, lepszij urośnie. A to wszyjsko niy ma prôwda. Ino jak tym roztomajtym łochyntolóm, zgobnikóm to wyeklerować. Kaj sie idzie łod Piekôr, bez Świyrklaniec, a i u nos łod Logiywnik aże na nasze Pnioki, to wszandy sie smyndzi, kopci polóno trółwa. Łod tego ci sie mogóm i chałupy hajcnóńć, i – corôzki wiyncyj – roztomajte stromy i inksze krzôki, krze i hraści. A mie ci to richtik pieron szczylô, kiej widza roztomajtych najduchów ze sztracheclami, kierzy faklujóm, hajcujóm wszyjsko, co sie ino do podpôlić, rozżygać. A tam we tych stromach, we tych krzôkach, charpyńciach żyjóm przeca te wszyjskie nasze gryfne ptôszki, ploncnom sie hazoki i inkszô gadzina, kierych ta flama abo uwańdzi, abo jóm na zicher spôli. Ludziska! A dyć dejcie pozór! Przeca my niy sóm same na tym świecie. Inksze stworzyni tyż kce żyć! |
|
| Strona 1 z 1 | Strefa czasowa UTC+1godz. |
| Powered by phpBB® Forum Software © phpBB Group https://www.phpbb.com/ |
|