Idzie to tyż posuchać na
www.ojgyn.blog.onet.plRółzczasu łódka, takô niysrogô kana, przibióła do brzega jednyj meksikóńskij wsi. Dupny hamerikóński rajzynder, kiery festelnie podziwiôł ryby fangniónte bez meksikóńskigo rybôka, spytôł sie go, wiela tyż to ci czasu zajimało mu jich łapniyńcie, fasniyńcie.
– Nó, niywłośnie dugo! – łodpedziôł Meksikaner.
– Nó tóż tedyć po jakiymu niy łostôłeś chopie na morzu dugszij, coby chycić wiyncyj takich fiszów?
Tyn Maksikaner wyeklerowôł tymu Hamerikónowi, iże takô małô ilóść rybów styknie mu gynał na jego, i jejigo familije, potrzyby.
– A co chopie robisz ze resztym frajnego czasu? – pytôł dalszij tyn Hamerikón.
– Anó, dugo nynóm, dugo śpia zatym chyca pôra fiszów, niyskorzij bawia sie ze mojimi dzieckóma, przetrôwia „sjesta” ze mojóm babeczkóm. Na łodwieczerz wylazuja do wsi i trefióm sie ze mojimi przocielóma, wysłepiymy wtynczôs pôra sznapsów, grómy na gitarach, spiywómy roztomajte śpiywki... nó, żyja pôłnióm życia...
Tyn hamerikóński rajzynder ale niy dôł mu dalszij gôdać i dalszij molyńdzi:
– Jôch skóńczół sztudiyrówać na MBA na Harwardzie, tóż tyż tak se medikuja, iże poradza ci deczko spómóc. Powiniyneś, gódzi sie, cobyś napocznół dugszij kôżdy dziyń łowić ryby. Mogesz wtynczôs mieć te ryby na przedej, mogesz je sprzedôwać. Bydziesz miôł nadbytni prófit, tóż tyż bydziesz sie móg lajstnóńć srogszô kana. Juzaś za nadbytnie pijóndze, ftore prziniesie ci srogszô łódka, mogesz sie sprawić drugô, trzeciô, szczwôrtô kana, i tak dalszij, aże bydziesz miôł côłkô flota bółtów. Wtynczôs tyż miasto sprzedôwać ino te swoje fisze postrzydnikóm, bydziesz móg paktówać, smówiać sie direkt ze przetwórnióma, a możno i bali łozewrzisz swoja włóśnô fabrika. Bydziesz wteda móg łosmolić ta maluśkô wiyś i przekludzić sie kajsik do Mexico City, Los Angeles abo i do Nowego Jorku. I już tamstela bydziesz móg reskiyrówać swojimi interesóma.
– A wiela czasu mi to panoczku zajimô? – spytôł sie tyn Meksikaner.
– Nó, możno tak wele dwadzieścia, dwadzieścia piyńć lôt! – łodrzyknół tyn Hamerikón.
– Nó, a co niyskorzij?
– Niyskorzij? Wtynczôs ci sie chopie dziepiyro napocznie – łodpedziôł tyn Hamerikón i zaśmiôł sie na côłki karpyntel. – Kiej już tyn twój „byznes” bydzie na zicher srogachny, mogesz napocznóńć sprzedôwać swoje „akcyje” i robić chopie milijółny!
– Gôdôcie panoczku milijółny? Na zicher, ja?... A co niyskorzij?
– Nó, bydziesz móg chopie przyjńść na pynzyjô, miyszkać kajsik we maluśkij dziydzinie, maluśkij wsi na wybrzyżu, bydziesz móg dugo spać, bawić sie ze swojimi dzieckóma, lecy kedy łowić ryby, przetrôwiać „sjesta” ze swojóm babeczkóm a wszyjske wieczory trôwić we szynkach ze przocielóma i kamratami...
Mórał, glajcha ze tyj gyszichty: Chopie! Zastanów sie, pomedikuj kany kcesz dójńść we swojim życiu, bo możno jużeś tam jes!
Zaloguj się
Zarejestruj się
FAQ
Szukaj
