| Świętochłowice - Forum bez polityki https://forum.swietochlowice.biz/ |
|
| Łoszkliwy kot, giździorski miałczek... https://forum.swietochlowice.biz/viewtopic.php?f=17&t=319 |
Strona 1 z 1 |
| Autor: | Ojgyn z Pnioków [ 24 sie 2014, 7:33 ] |
| Tytuł: | Łoszkliwy kot, giździorski miałczek... |
Idzie to tyż posuchać na www.ojgyn.blog.onet.pl Wiycie! Ludzie tajlujóm sie na takich, ftorzi majóm radzi roztomajtô gadzina, i na takich, kierzi niy ciyrpióm żôdnyj gadziny, a łosobliwie psów a kotów. Jô przinoleża do tyj drugij zorty chociach kiejsik tam basztardy cichtowôł, miôłech roztomajte fisze we akwariumie (podwiyl mi moja mamulka niy przikôzało je ze chałpy wykludzić), a i dwa kurzóntka trzimôłech na trzecim sztoku mojigo familoka na balkónie. Psiôków, i to łod blank maluśkigo, do srogich buldogów, żech sie pierónym bôł, festelniech sie jich strachôł. A kotów niy miôłech rôd ino skuli tego, iże łóne fyrtajóm zawdy swojimi włóśnymi drógami i poradzóm być pierónym łoszkliwe we swojim giździorstwie. I to ze tymi to kotami skuplowanô bydzie ta gyszichta. Psy i koty, gynał jak niyftore ludzie, poradzóm ciyngiym być niymocne (chocia niy wajajóm nikiej baby na gowa) i wtynczôs trza je – i to barzij niźli ludzi – fest flyjgować i kurjyrować. I słyszôłech kiejsik jak ci to jedyn mój kamrat, weteryniôrz tuplikowôł jednymu istnymu jak takimu ci łoszkliwymu miałczkowi dać do łykniyńciô medikamynt we pilach: Weź chopie tego kota nôjprzodzij na rynce i łobjimej go lewym ramiym tak, jak sie dziyrżi maluśke dziyciô. Chyć palcym skazujóncym i kściukym prawyj rynki fresa tego kota, naciś letko trzimajónc pila we reście palcysków. Kiej kot łozewrzi pychol wpuść pila mu do gymby, dozwół miałczkowi zawrzić tyn pychol i łyknóńć ta pila. Dźwignij ta pila ze dylinów i wysmyc kota spod szeslónga. Juzaś łobjimej kota lewym ramiym i łod wrotów ta samô lajera, powtórz wszyjsko ło nowa. Wysmyc kota ze szlafcimra i wyciep ta łozmamlanô pila do hasiô. Wyjmnij nowô pila ze pakslika, łobjimej kota lewym ramiym wrółz trzimej tóm lewóm gracóm wiyrgajónce zadnie szłapy. Łozewrzij pychol tego kota i palcym skazujóncym prawyj rynki wciś mu pila tak gymboko jak sie ino dô. Przitrzimej kotu zawrzity pychol i porachuj do dziesiyńciuch. Wyjmnij ta pila ze akwarjuma a kota ze garderóby. Zawołej tyż zarôzki swoja babeczka ku pómocy. Prziduś tego łoszkliwego kota do dylinów klinujónc go miyndzy kolanóma a ku tymi trzimej wiyrgajónce przednie i zadnie szłapy tego gizda. Niy zważuj na niske wyrcónce łodgłósy wydôwane w tym czasie bez tego kota. Niych twoja babeczka przitrzimô gowa kota i wrółz wciskô mu drzewnianny linijôrz miyndzy zymby. Zatym wciś ta pila wzduż linijôrza miyndzy łozewrzite zymbiska i spamiyntale głôskej tego kota po garle, co możno skłóni go do wartkigo łykniyńcia tyj pili. Zesmyc na dół kota, ftory zicnół na gardinsztangach i wycióng ze pakslika nowô pila. Zanotiyruj se, coby wymiynić gardiny. Pozbiyrej jesce szpliterki ze potrzaskanyj blumwazy ... mogesz je posklyjać je deczko niyskorzij. Łowiń terôzki kota we badytuch, a zatym niych twoja babeczka położy sie na tym kocie tak, coby ino jego palica wystôwała spodle jeji parzy. Umiyść pila we pojstrzodku plastikowyj rułki do nôpitków. Przi pómocy blajsztifta łozewrzij kotowi pychol, wciś rułka miyndzy łozewrzite zymbole i dmuchnij ta pila do pojstrzodka. Sprôwdź na łopakowaniu, eźli te pile niy sóm szkłódliwe dlô ludzi, a zatym wysłep jedna flaszka biyru, coby pozbyć sie niyprzijymnygo gyszmaku we gymbie. Łobinduj twojij babeczce rozdrôpane ramiy, a niyskorzij przi pómocy gorkij wody ze zajfóm wypucuj fleki kwie ze tepicha. Przeniyś kota do lauby sómsiada. Wyjmnij nastympnô pila. Narychtuj sie kolyjna flaszka biyru. Wetkej kota we dźwiyrkach byfyju tak, coby bez nuta wystôwała ino jego gowa. Łozewrzij mu pychol łeżkóm i takim maluśkim szlojderkym prasknij mu tóm pilóm miyndzy łozewrzite zymbiska. Prziniyś se szrałbyncijer i przikryńć wytargane zôwiasy ze dźwiyrek na swój plac. Wesłep piwo. Weź se chopie flaszka gorzôły. Nalyj se jaki sztamperlik i szluknij. Prziłóż zimny ómszlag na lico i sprôwdź, kiej łostatniô bółeś szczypióny na ściyklizna. Łoszpluchtej lico gorzôłkóm, coby zdezinfikiyrówać boloki i szluknij se nastympny achtlik gorzôłecki, coby ukojić ból. Potarganô hymda mogesz już wyciepnóńć na hasiok. Zaglingej po fojewera, coby syjmnyli tego dioseckigo kota ze stromu. Przepróś sómsiada, kiery wkarowôł autokiym we płot jak próbowôł łóminóńć kota, ftory przelatowôł bez hulica. Wyjmnij nastympnô pila ze pakslika. Skrympluj tego gizda sznuróm na pranie, sknółtluj do kupy jego przednie i zadnie szłapy a zatym przikrympluj go do nogi łod stoła. Weź rube skórzanne makówy. Wciś tymu gizdowi pila do gôrła i pociskej to wszyjsko srogim kynsym lakszinki. Już na isto niy musisz być blank opaterny. Przitrzimej gowa kota sztram na hółchkant, piónowo i wlyj mu dwie szklónki wody direkt do hyrtónia, coby spłókać ta pila. Wysłep rest gorzôły ze flaszki. Dej zwólô swojij babie, coby cie zakludzióła na pogotowie. Niy wyrobiej tam, ino siedź ze rułóm, coby dochtór móg ci poheftować ramiy i wyjmnóńć rest pile ze łoka. Drógóm do dóm wlyjź se jesce do sklepu myjblówygo i lajstnij se nowy stół. Zwóń terôzki do tiyrhajmu, coby zebrali tego łoszkliwca „mutanta” ze piykła rodym i badnij se eźli we pobliskim sklepie zoologicznym (na tyn przikłôd u Masonia) niy majóm możno jakich gryfnych kamczyków. |
|
| Strona 1 z 1 | Strefa czasowa UTC+1godz. |
| Powered by phpBB® Forum Software © phpBB Group https://www.phpbb.com/ |
|