| Świętochłowice - Forum bez polityki https://forum.swietochlowice.biz/ |
|
| Siykyra... https://forum.swietochlowice.biz/viewtopic.php?f=17&t=379 |
Strona 1 z 1 |
| Autor: | Ojgyn z Pnioków [ 16 lis 2014, 9:45 ] |
| Tytuł: | Siykyra... |
Idzie to tyż posuchać na www.ojgyn.blog.onet.pl Rółzczasu, nałónczôs roboty nad brzygym rzyki sióngorzowi, takimu polskimu „drwalowi” wypyrtła siykyra i śleciała, tónkła sie we wodzie. Tyn sióngorz siednół se i napocznół ślimtać jak nôjynty. Łorôz łobjôwiół mu sie Pónbóczek i spytôł sie tego istnego: – A po jakiymu chopie ślimtôsz? Tyn siógorz łodpedziôł, iże mu siykyra śleciała do wody. Na to Pónbóczek ślôz na ziym, wlôz do tyj wody i po jakimsik łoka mrziku wylôz nazôd ze... gryfnóm goldowóm siykyróm. Jes to twoja siykyra, twoja cieślica? – spytôł sie Pónbóczek tego sióngorza. – Niy! Blank niy! – łodpedziôł tyn sióngorz. Pónbóczek juzaś bulknół sie, zatónkôł sie we wodzie i po kwilce dziyrżół we ryncach strzybnô siykyra, i juzaś sie spytôł tego sióngorza, eźli to jejigo siykyra, jejigo cieślica. – Niy, niy! To tyż niy ma moja siykyra. – łodrzyknół tyn drwôl, tyn sióngorz. Pónbóczek trzeci rółz fuknół do wody i wycióng na wiyrch zieleznô siykyra. – Tóż to możno ta cieślica jes twoja? – spytôł Pónbóczek. – Ja, ja, to na isto moja siykyra! – uradowôł sie sióngorz. Pónbóczek festelnie rôd, co taki ućciwy i prawy czowiek deptô po ziymi i we nadgróda sprawiół mu wszyjske trzi siykyry. Tyn sióngorz wróciół do dóm szczysny jak sto diosków. Za pôra dnioszków tyn istny szpacyrowôł nad brzygym rzyki do kupy ze swojóm babeczkóm. Łorôz ta jego baba potkła sie i skipła sie, śleciała rajn do wody. Tyn sióngorz, tyn polski „drwal” siednół jak skorzij na rancie tyj rzyki i napocznół ślimtać. I juzaś pokôzôł mu sie Pónbóczek i sie go spytôł: – A po jakiymu chopie juzaś ślimtôsz jak nôjynty? – Anó, bo terôzki moja baba śleciała mi do tyj wody! Pónbóczek juzaś ślôz na ziym, wlôz do tyj wody i po jakisik kwilce wychynół śnij wrółz ze Jennifer Lopez. – Jes to twoja babeczka? – spytôł chopa Pónbóczek. – Ja, ja... to na isto moja babeczka! – łodrzyknół tyn istny. Pónbóczek sie ale festelnie snerwowôł i porwôł sie na tego chopa: – Ty giździe stopieróński! Ty chachmyńcie i cygónie nabijany! To blank niy ma prôwda! To niy ma twoja baba! A na to tyn sióngorz, tyn istny łodrzyknół ze rułóm: – Pónbóczku wybôcz mi te moje majtniyńcie. Dzisz! Kej jô bych ci pedziôł, iże Jennifer Lopez to niy ma moja baba, wróciół byś sie i przikludziół mi sam możno Cameron Diaz abo Claudia Schiffer, i eźli bych juzaś ci pedziôł, co to niy moja baba, na łostatku wróciół byś ze mojóm staróm. Pedziôłbych, iże to jes moja babeczka i wtynczôs erbnółbych wszyjske trzi. Ale, Pónbóczku, jôch jes ino chudobnym sióngorzym i niy szafnółbych, niy wydolółbych, coby mieć we kuście trzi baby! Beztóż tyż pedziôłech za piyrszóm razóm, iże to jes moja baba! Nó i jakô, moje Wy roztomiyłe, jes ze tyj gyszichty glajcha, jakisik mórał? Eźli chop cygani, to zawdy ino we przidajnym, wiyrsznim i zniósłym cylu. |
|
| Strona 1 z 1 | Strefa czasowa UTC+1godz. |
| Powered by phpBB® Forum Software © phpBB Group https://www.phpbb.com/ |
|