| Świętochłowice - Forum bez polityki https://forum.swietochlowice.biz/ |
|
| Ze tagebucha teroźnigo dziecka... https://forum.swietochlowice.biz/viewtopic.php?f=17&t=394 |
Strona 1 z 1 |
| Autor: | Ojgyn z Pnioków [ 30 lis 2014, 9:34 ] |
| Tytuł: | Ze tagebucha teroźnigo dziecka... |
Idzie to tyż posuchać na www.ojgyn.blog.onet.pl Znôdech ci kajsik we internecu taki szykownisty tagebuch terôźnigo dziecka. Posuchejcie! Pyndziałek: Świynty Mikołôj łozdôwôł gyszynki u starki i starzika. Joch erbnół ino kryjdki, farbiste bóndsztifty. Fajnistô gracka. Porozkłôdôłech te kryjdki na słodach. Niy miarkuja po jakiymu starzik skulnół sie na dół i możno ze staróści przestôł sie ruszać. Żôdnô ale kryjdka sie niy skiebzióła. Łojciec plasknół mie w rzić. Wiym terôzki, iże gracki kryjdkóma sóm zakôzane! Wtorek: Szumny i galantny dziyń. Trefiółech Ana na pogrzybie Starzika. Kej my już sie wróciyli nazôd, bawiylichmy sie u naszyj starki ze Anóm we dochtora. Bóło miyło i fajniście. Mamulka bóła złô, mamulka Any tyż bóła złô – Ana nôjradzszô. Niy lza u nôs bawić sie we dochtora. Dostôłech szmary. Wrółz zakôzanô jes cicho zabawa! Strzoda: Porozciepowôłech po dylinach szekuladowe ziôrka. Tatulek kupiół szłapka na myszy. Przi mamulce zjôdech pôra ziorek ze dylinów. Mamulka sie porzigała. Nachytôłech po bani. Zakôzane jes jedzynie szmektnyj szekulady! Szczwôrtek: Ciupnółech we łochrónce kryjdki łod Mikołôja na szykownistô biôłô mysza. Wraziółech jóm do farbistyj szachtelki. To bydzie gyszynk dlô mojij mamulki. Mamulka nôjprzodzij sie uradowała, ale kej łozewrziła ta szachtelka, to do imyntu zymdlôła. Tatulek bół festelnie niyrôd. Festelniech łobcis. Dôwanie gyszynków tyż jes zakôzane! Pióntek: Tatulek zawar mie we pywnicy. Jes fajniście. Zrobiółech prażoki, znacy sie frytki ze kartofli, kiere tam byli. Coby ino spómóc mamulce. Procnô robota, chnet côłke 100 kilo. Nachytôłech po rzici. Pómôganie mamulce jes tyż zakôzane! Sobota: Tatulek zawar mie dzisiej na górze. Tyż moc fajniście. Coby mu deczko spómóc napocznółech pucować rinny. Na hulicy stôła ciżba i prask. Fojermany ścióngli mie ze dachu. Tatulek bół ściykły jak sto diosków. Dostôłech festelnô pucówa. Pómôganie tatulkowi jes zakôzane! Niydziela: Tatulek zawar mnie dzisiej we laubie. Bóło zimno, tóż tyż łozfaklowôłech fojera. Juzaś przijechali fojermany. Szykowniste chopy. Wszyjsko łobloli do imyntu wodóm. Dostôłech, jak zawdy, po rzici. Przebywanie we ciepłym jes zakôzane! Pyndziałek: Uzdôłech, co jesce rółz łobocza se fojermanów. Zaglingôłech bez mobilniok; przijechali. Mamulka bóła festelnie złô. Fojermany jesce barzij. Nachytôłech po rzici. Zaprôszanie fojermanów jes zakôzane! Wtorek: Dzisiej blank cichy dziyń. Nicech niy zbajstlowôł. Mamulka moc łoztrzynsiónô i nerwyjs. Na wszeli zdarzyni dostôłech po bani. Zgniylstwo jes tyż mierske i niyprzijymne a ku tymu zakôzane! Strzoda: Byzuch u naszyj starki. Kej mie ino uwidziała zarôzki miała szuminy na pycholu. Mamulka zawarła mie we kuchyni. Stołki u starki sóm wysoke. Ulepszółech je bandzyjgóm elekstrycznóm łod starzika. Terôzki sóm jak przinôleżi. Mamulka sie napolóła i do imyntu wściykła. Nachytôłech festelnie po rzici. Ulepszanie stołków jes zakôzane! Szczwôrtek: Poszôłech ze tatulkym do lazarytu. Ku mamulce i starce. Łóne łobie majóm jakesik problyma ze nerwami. To cheba jakosik dziydzicznô niymoc. Dochtór kciôł użgać moja mamulka srogachnóm jegłóm. We łobrónie mojij mamulki prasknółech mu srogô szprica w rzić. Dochtór stopieróńsko sie drził. Łod tatulka dostołech po bani. Bróniynie mamulki jes tyż zakôzane! Terôzki wiym jedne: Wszyjsko jes zakôzane łokróm biciô dziecek! |
|
| Strona 1 z 1 | Strefa czasowa UTC+1godz. |
| Powered by phpBB® Forum Software © phpBB Group https://www.phpbb.com/ |
|