| Świętochłowice - Forum bez polityki https://forum.swietochlowice.biz/ |
|
| Nasze chopcy we Krakowie... https://forum.swietochlowice.biz/viewtopic.php?f=17&t=436 |
Strona 1 z 1 |
| Autor: | Ojgyn z Pnioków [ 11 lut 2015, 10:13 ] |
| Tytuł: | Nasze chopcy we Krakowie... |
Idzie to tyż posuchać na www.ojgyn.blog.onet.pl Antek i Francek, dwa festelne kamraty prziklechtali sie kiejsik aże do Krakowa, bo łōnym ftoś pedziǒł, co tam tyż idzie mocka ufechtować kole Wawelu. Wysztiglowali sie jak ino poradziyli nǒjlepszij i po jakisik śtyruch godzinach nabetlowali tela, co sie mōgli lajstnōńć jakisik łobiǒd we dobrym szynku. Razinku sie jim trefiōła knajpa „U Hawelki”. Wlejźli rajn i łobsztalowali sie łobiǒd. Podwiyl jesce na te łobsztalowane jǒdło czekali, Antek uwidziǒł takǒ gryfnǒ karafecka na stole a driny cosik farbistego (możno gorzǒłecka po jakich skorzyjszych klijyntach?). Kiej ino żǒdyn sie niy gawcōł a Francek kukǒł za jednōm takōm gryfnōm dziołchōm, Antek łaps za ta flaszka i zrobiōł, pociōng festelny, srogi szluk. A, iże to bōł łocet, łocet winianny – czego sie bōł spodziǒł – to ci mu cǒłki pysk wykrziwiyło a płaczki pociykli mu po fresie. Francek kiej go takim uwidziǒł, pytǒ sie opaternie: – Antku, co ci sie stało? Czamu ślimtǒsz? – Anō, dzisz Francek, spōmniǒł mi sie kamrat ze kierym joch bōł na wojnie i tam ci go zatrzasła granata. I beztōż tyż beca. Za jakosik kwilka, kiej to terǒzki Antek gawcōł sie kaj indzij, Francek fasnōł ta samǒ karafecka, festelnie śniij pociōng i – tak jak przodzij Antek – zadłǒwiōł sie a ślypia zaszli mu płaczkami. – A ty juzaś po pierōnie ślimtǒsz? – pytǒ sie terǒzki Antek. – Anō, jǒ to terǒzki pierōnie beca skuli tego, iże to ciebie wtynczǒs razinku ta granata niy praskła!!! |
|
| Strona 1 z 1 | Strefa czasowa UTC+1godz. |
| Powered by phpBB® Forum Software © phpBB Group https://www.phpbb.com/ |
|