| Świętochłowice - Forum bez polityki https://forum.swietochlowice.biz/ |
|
| Pniokowy dupny rajca... https://forum.swietochlowice.biz/viewtopic.php?f=17&t=444 |
Strona 1 z 1 |
| Autor: | Ojgyn z Pnioków [ 25 lut 2015, 8:49 ] |
| Tytuł: | Pniokowy dupny rajca... |
Idzie to tyż posuchać na www.ojgyn.blog.onet.pl – Jezderkusie! Kajście sie to Grolicko podziywali? Jǒch Wǒs już cheba ze piyńć miesiyndzy niy widziała we kościele. – zawrzeskła wele naszyj „Jōzefki” starǒ Erna Bińkowǒ, kej szła na pǒł dziewiōntyj na mszǒ. – Anō, wiedzōm łōni, pojechałach do cery we Miymcach na tydziyń skorzij tego naszygo łoszkliwego welōnku na rajcōw, prezidyntōw... i kogo tam jesce. – Niy gǒdejcie! Ja? Skuli welónku? A czamu ‘eście sie do cery wykludziyli, i to razinku wtynczǒs? Niy zdało Wōm sie fto sztartowǒł we tym welōnku? Niy podobali sie Wōm możno nasze pniokowe kandidaty? – Nō, niyftorych, to na isto miałach pǒłnǒ rzić... – Nō, cheba niy tego naszygo briftryjgra-dyrechtora... na wiyki wiykōw amyn pniokowego rajce? – spytǒłech sie opaternie, bo tyż tego dioseckigo łochyntola niy miǒłech rǒd. – Jeee, Grolicko, sómeście już nazǒd dōma, ja? – przystōmpiōła ku nōm Byrbla łod Morōński wrōłz ze jeji kamratkōm Kristōm ze piyrszego sztoku. – Jużech sie tropiǒła, bo wiela sie sam u nǒs na Pniokach zwekslowało... – Ja, ja... a wiycie ło tym, iże yntlich niy dostǒł sie już za rajce do Rady Miyjskij tyn stopierōński angyjber, tyn na „wiyki, wiykōw amyn” rajca-briftryjger... – Niy gǒdejcie? Ja? Niy wywelowali go już? spytała sie Grolicka. – Bo łōn tyż ci mie już festelnie nerowǒł. Taki ci bōł śniego „grǒf vōn Rotz”, jak go samtukej na Pniokach niyftore mianowali. – Nō, ale... przecamć łō niy bōł taki blank zły. Roztomajte pōńcie łōn nōm sam organizjyrowǒł. A i ze kibicami „Ruchu” zawdy szǒł na szpile... – Ja, i niōs na przodku krziż choby na pōńć do Piekǒr a nieskorzij to te jejigo kibice poradziyli sie prać miyndzy sobōm i łobǒlać wszyjsko na co drōgōm natrefiyli. – wstyrknōł sie do gǒdki Jorg łod Pelcynyj. – A cōż wy tak baby fōrt i jednym ciyngym na niygo wajǒcie? – łozwała sie Krista. – Przecamć łōn bōł na isto dobry... katolik, prǒwda? – Ja, ja taki dobry katolik, iże kej ci mu pizło Abrahama to zarǒzki zwekslowǒł swoja piyńdziesiyńciolytniǒ babeczka na... dwie dwadziesto piōntki, bo niy lza mu bōło zadować sie ze takōm starōm mamzelōm. – dociepła Erna Bińkowǒ. – Nale, coby sam niy gǒdać, poradziōł sie chop wele swojij rzici, wele swojigo interesu fest łobyrtać. – rzyknōł Pelcyn Jorg. – Tak dugo lizǒł dupa tym ze tego ferajnu „Wspōlnie dlǒ Sia” aże go zrobiyli dyrechtorym... – Ja, zrobiyli go dyrechtorym, drugim dyrechtorym we trzecij raji, coby mu nastykło betkōw na kust dlǒ staryj familiji i modyj flamy, kōnkubiny – dociepła swoji Rubǒ Angela, ftorǒ bez tyn czǒs dokulwitała sie ku nōm. – A spas ci sie, przibrǒł łōn choby kormik. – Nō ja, bo dyć żysz miǒł ci łōn nǒjbarzij rǒd te wszyjske „proszōne” wieczerze, fajery, gōściny kaj mōg sie na krziwy ryj sie naćkać i posłepać. – dociep Jorg. – Wiycie! Bylichmy do kupy rajcami we Chorzowie we latach 1994-1998 i jǒ go spōminōm ino z tego, iże tyn łochyntol bezmać pierōnym sie gańbiōł łajzić ze swojim synkiym na kiyrhow, bo tam bōł grōb i fajny dynkmal chorzowiǒka Władysława Truchana, a łónymu na te miano wylazowali pinkle na fresie choby po ośpicy. – pedziǒłech, boch już kciǒł, coby my dalszij ło tym angyjberze ustali gǒdać. – To padocie, moje wy roztomiyłe, iże łōn już niy ma rajca we Chorzowie? – Niy, yntlich już łōn niy ma chorzowski rajca – łodrzyknōłech stanōwczo. – Jezderkusie! To cosik mi sie zdǒ, iże go już tyż na zicher ściepnōm ze tego dyrechtorskigo zesla! – uradowała sie Erna Bińkowǒ. – Niy, niy ściepnōm, niy zdōnżōm... łǒn ci festelnie zbamōnciōł śtyry dziołchy i jednego ficywyrta we tyj jejigo miyjskij fyrmie i wartko założōł ci blank nowy „Związek Zawodowy”... – Nō ja... zawdy ci bōł śniego miglanc i macher... – Nō, już za pierōnym starego piyrwyj mōndre ludzie gǒdali przecamć, iże: do frechownych i łoklanych świat przinǒleżi, prǒwda? – pedziała na łostatku Byrbla. |
|
| Strona 1 z 1 | Strefa czasowa UTC+1godz. |
| Powered by phpBB® Forum Software © phpBB Group https://www.phpbb.com/ |
|