| Świętochłowice - Forum bez polityki https://forum.swietochlowice.biz/ |
|
| Hajna... https://forum.swietochlowice.biz/viewtopic.php?f=17&t=480 |
Strona 1 z 1 |
| Autor: | Ojgyn z Pnioków [ 22 kwie 2015, 8:29 ] |
| Tytuł: | Hajna... |
Idzie to tyż posuchać na www.ojgyn.blog.onet.pl Przi borsztajnie styrcy jedyn istny i mǒchǒ rynkōm na taksa, kierǒ poblisku przejyżdżała. Taksa zahaltowała, tyn istny wlǒz rajn a tyn taksiǒrz napoczynǒ łozprǒwka: – Dobrze, iżeście na mie panoczku trefiyli. Blank gynał jak... Hajna. – Wybǒczōm mi łōni, fto? – Jak to fto? Anō Hajna Kopyciǒk. Niysamōwity, niymōżybny chop, zawdy wszyjsko robiōł jak przinǒleżi, porzōmnie i na czǒs. Potrza wōm bōło taksy razinku wtynczǒs, kejech bōł frajny i przejyżdżǒłech tukej. Hajna taki mazel miǒł zawdy, za kǒżdōm razōm. – Nō, niy przesadzejmy... ajnfachowy cufal... – Dlǒ Hajny niy istniyli take „cufale”. Łōn wszyjsko robiōł fachmōńsko, grajfnie i perfektnie. Spokōjnie mōgby grać we tynisa abo tego modernego terǒzki golfa ze fachmōnami. Poradziōłby tyż bez wysiyłku, jako gwiǒzda prōgramu, śpiywać we ōperze abo tańcować we balycie. – Hmmm... to na isto musiǒł być łosobliwie grajfny i utaliyntiyrōwany czowiek! – A cobyś Pōn wiedziǒł! Miǒł ci tyż łōn niysamōłwitǒ pamiyńć. Pamiyntǒł ci łōn wszyjske daty gyburstakōw we swojij familiji i wszyjske familijne rōcznice. Miarkowǒł ci tyż wszyjsko ło winach, nō, wiysz pōn, kiere wino do jakigo jǒdła i we jakim lampusie. We chałpie poradziōł sprǒwić wszyjsko sōm, kilszrank, telewizor, kocher... Panoczku! Niy to, co jǒ... jakech jǒ wymiyniǒł zicherōngi dōma, to na cǒłkij hulicy bōło „zaciymniynie”. – Hmm... jakosik niy poradza wymiarkować takij ci niydościgłyj, wywołanyj perzōłny... – Nō, jǒch, tak prǒwdōm panoczku, tyż żech nigdy niy trefiōł sie ze takōm... – Jakōż to? To panoczku rzyknijcie mi ino, skany łōni tela wiedzōm ło tym chopie? – Anō, łożyniōłech ci sie ze gdowōm pō niym... |
|
| Strona 1 z 1 | Strefa czasowa UTC+1godz. |
| Powered by phpBB® Forum Software © phpBB Group https://www.phpbb.com/ |
|