Świętochłowice - Forum bez polityki

Idzie to tyż posuchać na www.ojgyn.blog.onet.pl

Mōmy już lato, chnet pŏłne lato. A to ci jes na isto gyferlich. Przilazuje ku nōm piōntek, łodwieczerz, zatym sobota... niydziela, roztomajte moderne terŏzki grile, a niyskorzij to jes, to samtyjszy chop mŏ kacynjamer, szmerckopf, i jak ci to kejsik śpiywŏł Wiesiek Golas: tōmpanie biŏlych mew. Znaczy sie srogi kac.
A na kaca? A na kacynjamer to nŏjlepszy jes klin. I jak to gŏdajōm: seta z rana, lepszejszŏ niźli zana.
Wysłepiesz chopie seta i inkszy czowiek we ciebie wlazuje. Wlazuje i... tyż mu sie chce słepać. No, tōż chlist w tyn gupi pysk. I tyn inkszy czowiek, kery we cia chopie juzaś wloz... przismyczōł ze sia kamratow, kerym tyż sie kce słepać. A ło szaroku, z rańca? A ło szaroku zasik usmolōny dziyn i juzaś seta i nowy czowiek wlazuje we cia... chrrr, chrrrr, chrrrrrrr...
Ale, chopy, niy ma sie co trŏpić. Richtik na kaca dobry jes ino klin. Przeca nic tak niy flyjguje czowieka na drugi dziyń. Ani żŏdyn apap, ani aszpiryna, ani... Goździkowŏ ino dobry, zimny sznaps i szopa piwa. Tu moge być i łostuda. Bo niyftore to niyskorzij majōm kaca „szpiralnygo”. Niy wiycie co to jes? To jes ganc ajnfach tak: eźli Wy chopy mŏcie kaca, a tyn wasz kac mŏ tyż jesce kaca i zatym tyn kac, tego waszygo kaca, tyż ci mŏ kaca, to to ci jes już na isto tyn kac „szpiralny”. A dobrze flyjgowany kac moge zetwać i... cŏłke dwa tydnie!
Ale, ale...
Rano, ćma... nō, możno niy tak blank rano, bydzie wele połednia, we ślypiach ćmi mi sie jak sto dioskōw i moty ciyngiym furgajōm a ku tymu szczyplawo, chobych bez śtyry godziny durch gawcōł sie we szwajsaparat, lynzyk nikiej zola Cieślikowego tryjtka, ku tymu we gymbie smrodlawo chobych złyknōł trzi tydnie niyprane fuzekle. Na łostatku we gowie briwy i cukrōwy rōmplujōm choby fto na szlagcojgu grŏł.
Co tam byda wiela tuplikowŏł, same to chopy miarkujecie, prŏwda?
Łorŏz glingŏ telefōłn. Ludzie! Choby fto ściep ze trzecigo sztoku ze piytnŏście piyrwyjszych kankōw na mlyko. Abo, choby praskli żeleźnianne dźwiyrze we werku. Chnet umrzity, blank niy mōnter biera te cedzitko do dakla... ale ze daleka, coby mi palica niy pukła...
– Halo! Klinika...?
– Jezderkusie! Jakŏ klinika? Czowiek niymocny, po chopsku, po gorzŏle, ale coby zarŏzki ci ze lazarytu glingali?
Ciepnōłech dyć cedzitko na widołki i biera sie, coby jakisik ōmszlag sie na łeb prziflostrować.
Drrr, drrr, drrr... zasik telefōłn.
– Halo, halo! Klinika...?
– A dyć dejżysz ty pierōnie pokōj ze tōm klinikōm, bo kejbych cie scopiōł, miŏł sam cie przi sia, to jakbych cie prasknōł bez pysk, to byś sie na isto swojimi szłapami deknōł!
I juzaś gichnōłech cedzitko na widołki. Kwilka pokōj. Możno ci już niy bydzie czowieka tyn diosecki łochyntol szterowŏł? Możno udŏ sie mi trefić zeltrōwkōm do szolki, coby chocia ździebko do tego chyrtōnia nakidać podwiyl niy lajstna sie sznapsa ze piwym.
Drrr, drrr, drrr... biera ta suchŏwka i już kca gizdowi nazdać choby świni do grotka aże suchōm a tu Bercik zachrapociałym głōsym, sztimōm choby tyn cŏłki Armstrong gŏdŏ:
– Ojgyn, niy łodkłodej suchŏwki, doczkej kwilka. Jŏ cie ino kciŏł spytać eźli szlukniesz jakigosik maluśkigo... „klinika”?

_________________
Ojgyn z Pnioków