| Świętochłowice - Forum bez polityki https://forum.swietochlowice.biz/ |
|
| Blóndina we autoku... https://forum.swietochlowice.biz/viewtopic.php?f=17&t=536 |
Strona 1 z 1 |
| Autor: | Ojgyn z Pnioków [ 26 lip 2015, 8:05 ] |
| Tytuł: | Blóndina we autoku... |
Idzie to tyż posuchać na www.ojgyn.blog.onet.pl Rōłzczasu jedna blōndina jedzie autokym kole 150 kilomyjtrōw na godzina. Zahaltowŏł ci jōm policajt i rzōńdzi: – Przekrōczyli łōni paniczko pryndkōść tōż tyż bydzie sztrofa. Dadzōm mi łōni dowōd rejystracyjny i prawo jazdy. – Aaa, łōne łostali we schōwku autoka. – To przecamć mogecie de papiōry paniczko wyjmnōńć, prŏwda? – Ale niy we tym autoku panoczku policajcie. Tyn jes kradziōny, łōn jes pichniynty! – To czamuście paniczko chabli, zwyndziyli tyn autok? – Przecamć niy byda we autoku wojzić zezwłokōw. – Jakich to... zezwłokōw? – Nō, tyj baby, kerŏch tyrpła na drōdze. – Zatrzaśliście paniczko jakoś baba we wypadku, we niyszczysnym cufalu? – Nō, łōna po tym tyrpniyńciu jeszcze zōła... toch jōm musiała puknōńć, do imyntu zastrzelić. – A czym’eście jōm zastrzelyli? – Pistōłlōm, ftorŏ tyż jes we schōwku. – Policajt bōł we srogim sztichu po tym wyznaniu ale pomyślŏł, iże trefiōł na gupiŏ blōndina, kerŏ mu wszyjsko wygŏdała. Wezwŏł tyż zarŏzki tyn cŏłki SWAT. Te wartko przigzuli, policajt wszyjsko jak przinŏleżi wytuplikowŏł, wojŏki ze tego SWAT-u łobstawiyli autok tyj blōndiny i kŏzali łōnyj łozewrzić tyn schōwek. Blōndina łozewrziła schōwek a tam leżŏł... dowōd rejystracyjny i prawo jazdy. Oficyjer ze tego SWAT-u kuknōł rajn i pytŏ: – Kaj jes ta pistōłla? – Jakŏ juzaś pistōłla? – Anō ta, ftorōm łōni paniczko zapukali, ta baba we gypeku. – Przecamć niy ma żŏdnyj baby we tym gypeku! Tyn cŏłki SWAT ruguje, sprŏwdzŏ i richtik, nic niy ma driny we gypeku. – Tōż rzyknijcie mi po jakiymu chabliście, ukradliście tyn autok? – Dyż żysz, to jes moje... auto! I ło co wōm sie rozłajzi? – Tyn sam policajt pedziŏł nōm, coście paniczko tyrpli na drōdze jakosik baba, zatym ‘eście jōm paniczko zastrzelyli i wiyźliście jōm pichniyntym autokym. – Ja, ja... i pewnikym pedziŏł wōm tyż, iże przekrōczōła pryndkōść, prŏwda? |
|
| Strona 1 z 1 | Strefa czasowa UTC+1godz. |
| Powered by phpBB® Forum Software © phpBB Group https://www.phpbb.com/ |
|