Świętochłowice - Forum bez polityki

Idzie to tyż posuchać na www.ojgyn.blog.onet.pl

Nō, tōż mōmy już pōłowa wrzyśnia a jŏch przed feryjōma jakechmy ze mojōm Haźbiytkōm pofurgli do Ygiptu. Tōż tyż terŏzki, już dlŏ niyftorych po latowych wandrach, kciŏłbych sam ździebko jesce ku tymu dociepnōńć.
Wiycie! 5 listopada dziewiyńćdziesiōnt trzi lata tymu nazŏd (we 1922 roku) łodkopali, znŏdli pierōnym ważny grōb we Ygipcie; srogachny grōb faraōna TUTENCHAMONA. To ci bōło na isto festelnie ważne dlŏ tych wszyjskich, kerzy sztudiyrowali historyjŏ Ygiptu. I szłoby sam bez pŏra godzinōw ło tym łozprawiać, nale niy byda smyndziōł i bajdurzōł, bo to niy ta sztela, tyn czŏs, i nie ta przileżytość. Powia tela, coch widziŏł na swoji ślypia we takim muzyjōm we Kairze takŏ blank, ale to blank, cŏłkŏ ze złota, cŏłkŏ goldowŏ karyta, kerōm tyn cŏłki faraōn po tyj jejigo Sakkarze fyrtŏł. Nō, i jesce do tego jejigo fresa tyż ze goldu łodlōnŏ, zrychtowanŏ, choby jejigo richticzny pychol. Suchejcie! Śtyry złote kofry, kwarcytowy zarkofag i trzi goldowe truchły mieli do kupy śtyry cetnŏry goldu, czystego złota, pur goldu.
Możno ftosik sie spytŏ po jakiymu jŏ sam ło jakimsik faraōnie gŏdōm. Anō to tyż kejsik bōła dlō mie zacałbrowanŏ dziydzina, i to niy ino skuli ksiōnżki Prusa i fylmu „Faraon”. Jŏch czytŏł wszyjsko, co sie ło tym starożytniym kraju pisało, poradziōłech na spamiyńć wyrachować wszyjskich, nŏjważniyjszych faraōnōw; tych Ramzysōw, Totmesōw, Amenchotepōw, i te nŏjgryfniyjsze jejich kobiyty: Hatszepsut abo Nefertiti. I łod maluśkigo bajtla kciŏłech hań-tam powandrować.
Terŏzki wszyjskie mogōm, kej ino kcōm, fyrtać tam kaj ino kcōm a jŏ ze mojōm Elzōm byli my gynał śtyrdziyści trzi lata tymu nazŏd u tych Araberŏw. Pofurgnyli my tam fligrym (fto jesce boczy ruski, kery sie IŁ-18 mianowoł?). Wylandowali my we nŏjsrogszym afrikańskim miyście Kairze, kery wteda miŏł ci już iber dziesiyńć abo i jedynŏście milijōłnōw ludzi. A jŏch sie na isto niy poradziōł doczkać, kej ci yntlich nŏs zakludzōm do tych cŏłkich piramidōw. Nŏjstarszŏ to bōła – jakech już łod bajtla wiedziŏł – takŏ ze samych słodōw, piramida Dżesera we ichnij Sakkarze (niy, niy Saharze, ino Sakkarze – pisze sie to Saqqara). Nō i te nŏjważniyjsze, te kere wszyjskie ze łobrozkōw znajōm i boczōm piramidy: Cheopsa, Chefrena i Mykerinosa. Niy byda sam za wiela eklerowŏł, tuplikowŏł, powia ino tela, co ta nŏjsrogszŏ, ta piramida Cheopsa jes ci telŏ, iże szłoby do nij skukać łorŏz: Bazylika św. Pyjtra ze Rzymu, katyjdra św. Pawła ze Londynu i jesce ku tymu katyjdry ze Mediolanu i ze Floryncyji. Nŏjwicniyjsze bŏło kej my ze Elzōm rajtowali na kamelach. Łod takigo szynku, kery Napoleon III zrychtowŏł swojij babie, rajtowali my ci na tyj gadzinie do Gizy, kaj ōngyfer 2500 lŏt przed naszōm yrōm napoczli te piramidy stŏwiać. Nŏjlepszejsze to ci bōło te rajtowanie. Wlŏzech ci na ta kamela, kerŏ siedziała ze podwiniyntymi szłapami. Taki czŏrny Beduin, co to te kamele wachowŏł, kŏzŏł mi łoblyc ta ichniŏ galabija (z arab. dżallabijja), na gowa nametlŏł mi tyn jejigo turban a skuli tego, iżech niy miŏł wteda bryli na kicholu, moja Elza mie niy poznała, boch wyglōndŏł na isto nikiej richticzny Araber. Cosik tyn czŏrny forsknōł na ta kamela, gwizdnōł i... ludzie, wiela niy brakło a prasknōł bych pycholym na ziym, bo tyn bydlŏk wstŏwŏ nŏjprzodzij dupōm, a dziepiyro niyskorzij sztrekuje przednie szłapy. Jakech sie już deczko spamiyntŏł, kamela poszła... kalupym aże do tyj Gizy, kaj te nŏjważniyjsze piramidy styrcōm. Pierōnie, to bōła rajza. Żŏdnyj brymzy ta kamela przeca niy mŏ, żŏdnygo ludzkigo lynzyka tyż niy poradzi spomiarkować, ino pruje, gzuje choby łōnyj fto łogōn kole rzici podpŏlōł. Moja Elzka wrzescy na cŏłki karpyntel, bo tyż chnet by ze tyj kameli śleciala. Ryczy: Ojgyn, Ojgyn, bo mie blank we tych ichnich klajdach niy poznała (mogecie sie wystawić: chop we kiecce, we klajdzie?). Jŏ blank nic niy słysza, bo mōm ta moja palica zabindowanŏ we tyn turban. Araber za niōm ze chichraniym powtŏrzŏ tyż: Ojgyn, Ojgyn. Gŏdōm Wōm łostudy i larma choby wielgachny rōmel na Pnioki przijechŏł. A kamela nic, ino fyrtała choby po glajzach, chciach jōm ci pŏra razy świtnōł po ziobrach, chociach targŏł za te lyjce, ryczŏł: prrr, stōj ty pierōno, giździe diosecki... Sztopła, zabrymzowała na szlag dziepiyro przi takim srogim grotku, kaj bōła woda dlŏ tyj gadziny, i juzaś: tak jak wstŏwała, nŏjprzodzij chlastła na klynczki, na przednie kolana. Jŏ fresōm prasknōł ło jeji gnyk. Łōna zicła na rzić, aże mi we gowie tōmpło. Jakech na drugi dziyń szŏł, to już Wōm niy byda eklerowŏł, bo sie Elza symie chichrała, iże pyndaluja choby synek łod dragōna i kobyły.
Niyskorzij to my jesce, ale to niy wszyjskie, kletrowali sie na ta srogŏ piramida Cheopsa i rajn do pojstrzodka. Tela, co tam już nic wicnego niy bōło. Luftu tyż. Nŏ i tak sie miarkuja, coby to możno stykło ło tym Ygipcie, boch już pŏra razy ło tyj naszyj rajzie sam łozprawiŏł.

_________________
Ojgyn z Pnioków