Świętochłowice - Forum bez polityki

Idzie to tyż posuchać na www.ojgyn.blog.onet.pl

Jużech niyrōłz samtukej eklerowŏł, iże musza poniykedy posznupać bele kaj po cajtōngach i po internecu, coby znojść jakesiś interesantne kōnski, kere by mi gynał sztimowali do mojich radijokowych (i niy ino radijokowych) łozprŏwek, berōw i bŏjek. Tak tyż bōło i dzisiŏj. Znodech szykownisty kōnsek Pawła Wakuły (ftorego teksty mōm rŏd czytać) i zarŏzki przełożōłech go na naszŏ gryfnŏ ślōnskŏ gŏdka.... posuchejcie (poczytejcie):
Wiycie! Łapnōłech ci rōłzczasu jednego cwerga. Tak po prŏwdzie toch go niy łapnōł, ino retnōłech ci go, coby sie niy hangnōł. Skrzŏt stŏł na rancie talyrza ze nudlzupōm i ślimtŏł choby nŏjynty. Na karku miŏł ci przikrymplowanŏ berga, nō maluśki fojersztajn. Jŏ blank niy mōm rŏd nudlzupy ze płaczkami, tōż tyż łapnōłech ci go za jakelka i łodciōngnōłech ci go snad kraju.
– A łostawiōm mie łōni! Taki ciul jak jŏ niy zasuguje przecamć na kolyjnŏ szanza! Kca na zicher umrzić! – szkamrŏł i lamyńciōł tyn cwerg.
– Łopowogi synek! Kŏżdy mŏ prawo, mo recht do życiŏ! – usiyłowŏłech ci go spiyrać, dodŏwać mu pociyszyniŏ.
– Ale niy jŏ! – ślimtŏł. – Wszyjsko to moja wina, wszyjskimu jŏch je winowaty! Dokludziōłech cŏłki kraj, cŏłkŏ naszŏ dziydzina do rujiny! – we takim akcie deszperacyji, wierzyjnōści napocznōł tuc palicōm ło zalcfaska.
– Spamiyntej sie! Taki srogi chop... hmm... znaczy, niy krymfuj, niy histerizuj!
Bōłbych ci mu naprŏł po pycholu, ale postrzimŏłech sie, miarkowŏłech sie, bo tak prŏwdōm, to jŏ przecamć niy bija, niy piera myńszych łod sia. Miasto tego juzaś łapnōłech ci go dwōma palcyskōma za szkrawitel i zŏcnie, moc tyngo ci niym potyrpŏłech.
Choby ci sie spamiyntŏł, a jŏch cingnōł dalszij ryjda:
– Fto ci taki gupot nałosprawiŏł? Na isto uwiyrzōłeś we te starucne cygaństwo, iże wszyjsko, co łoszkliwe i złe we naszyj dōmowinie, naszym faterlandzie, dziyje sie ino bez... cwergi?
– Kej to na zicher jŏ! – prasknōł sie maluśkōm gorzciōm we piyrś. – Katastrofa finanzōw jawnych (publicznych), zeszrōtowanŏ sużba zdrowiŏ, padniyńcie i tyn krach ZUS-u, urwa familijnych wertōw...
Poniywōłnie parsknōłech śmiychym. Bezsprzycznie, jużcić poczuł sie łōn blank łopuczōny i zaufryjgowany, bo zrobiōł ci sie szarłatny na fresie (terŏzki bōł ci łōn już cŏłki czerwiōny) i sztreknōł frechownie gowa.
– Niy wiyrzōm mi łōni, ja?
– Ło ja, wiyrza, wiyrza! – zapewniōłech napryndko, bo gynał miarkuja, iże niy lza wadzić sie ze pofyrtańcōma. – Nale.... Po prŏwdzie, jak ty to robisz?
– Anō, ganc ajnfach, szeptłōm politykerōm do dakla bele co! – wytuplikowŏł mi to ze niywinowatōm szczyrōściōm. – Zaobycz robia to we nocy, kej nynajōm. A jak już sie łocucōm, to sōm już łōne gynał bezymie urobiōne.
Poczułech co mi reszt mojich wosōw stanōł na gowie.
– A kōmuś we łostatnim czasie szeptłŏłeś do dakli?
– Anō, panoczku, tym, co zawdy! Panoczkowi Prezidyntowi, paniczce prymiyrce, roztomajtym ministrōm, posłōm, synatorōm.... Nŏjczyńścij szeptłōm tym ci „liderōm”, szpicnlajterōm łopozycyji. Gōwnie tymu blank niysrogimu, bo łōnymu nŏjlekszij fuknōńć do dakla!
– A niy ma ci gańba? Po jakymu ty to robisz?
Tymu knyrpsowi płaczki stanyli we ślypkach.
– Tōż to taki u mie nŏłōg, uzaleźniynie... – wyeklerowŏł mi. – Ganc ajnfach niy poradza sie łoprzić! Wiedzōm łōni, jŏ kca jak nŏjlepszij, a zatym w wylazuje jak zawdy.... Nale, jŏ łod dzisiŏj na isto sie poprawia! Byda łōnym podpowiadŏł same ino dobre zachy! For got prziłobiycuja!
Cwerg pewnikym gŏdŏłby dalszij, ale jŏch już blank niy suchŏł. Opaternie, ale bezglyndnie sztuchnōłech ci go direkt we strōna talyrza ze nudlzupōm!

_________________
Ojgyn z Pnioków