| Świętochłowice - Forum bez polityki https://forum.swietochlowice.biz/ |
|
| Musza to jesce ino pedzieć... https://forum.swietochlowice.biz/viewtopic.php?f=17&t=587 |
Strona 1 z 1 |
| Autor: | Ojgyn z Pnioków [ 28 paź 2015, 8:54 ] |
| Tytuł: | Musza to jesce ino pedzieć... |
Idzie to tyż posuchać na www.ojgyn.blog.onet.pl Trefiōłech niydŏwno jednego mojigo kamrata jece ze Politechniki. Kielanŏście lŏt my sie nikaj niy spichli, a i nasze drōgi po tych sztudijach setnie ci sie we inkszych kyrōnkach rozyjńszli. Terŏzki, kejech ci go trefiōł sam u mie na Pniokach, zdŏł mi sie łōn ale jakisik taki teskliwy i markotny. Skrziwiōł ino gymba, zrobiōł macha jak mie ujzdrzŏł... – Pyrsk Erich! Co tam u cia? – uradowŏłech sie festelnie ze naszygo trefu. – Eeee tam, same turbacyje i zgłoby ślatujōm ci na mie. – Niy gŏdej! Widza przeca echt, co ci sie darzi choby ci skrzotek srŏł... sztramski ancug łod Giorgio Armaniego abo Karla Lagerfelda, biŏłŏ hymda Brooksfield abo ino Wōlczanka, binder Willsoor, szczewiki... to cheba Bata, co już niy spōmna ło buksioku... Rolex to abo niy, to pewnikiym Philippe Patek... – Niy, to ino Jaques Lemans... – łodpedziŏł jankornie Erich. – No, tōż niy miarkuja... – Urodziyło mi dziecko... synecek... – Jezderkusie chopie! Tōż to kŏżdy inkszy chop bōłby rŏd choby mu fto fliger fōndnōł, miŏłby mocka uciychy, iże mu sie na stare lata udało prasknōńć tora... przeca to możno już łostatni szus... – Ja,ja inksze chopy mieliby możno i srogŏ uciycha... – Pierōnie! Niy poradza zmiarkować, po jakiymu ty sie niy radujesz, skuli czego jeżeś taki markotny? – Nō, bo wiysz Ojgyn... jŏ jece musza ło tym pedzieć mojij... babie! |
|
| Strona 1 z 1 | Strefa czasowa UTC+1godz. |
| Powered by phpBB® Forum Software © phpBB Group https://www.phpbb.com/ |
|