| Świętochłowice - Forum bez polityki https://forum.swietochlowice.biz/ |
|
| Downo po welónkach... https://forum.swietochlowice.biz/viewtopic.php?f=17&t=603 |
Strona 1 z 1 |
| Autor: | Ojgyn z Pnioków [ 29 lis 2015, 10:11 ] |
| Tytuł: | Downo po welónkach... |
Idzie to tyż posuchać na www.ojgyn.blog.onet.pl Nō, tōż mōmy już po tych wszyjskich welōnkach – gryfnych, lebo i niy. Niy gŏdŏłech skorzij, bez cŏłki miesiōnc, nic we radijoku ło tym łostatnim, boch niy kciŏł Wŏs, moje Wy roztomiyłe za tela gorszyć. I tak ci sam blank niy miarkuja, eźli mōm sie radować, eźli być teskliwy i mieć mankulijŏ? Jŏch ci tam niy ma jakisik polityker (chociach bez łoziym lŏt bōł rajcōm we Chorzowie), nale swōj filip mōm, kukōm na lewo zajta, kukōm na prawo i cosik mi sie zdŏ, corŏzki barzij miarkuja – a przecach przedrzistŏł, przefyrtŏł na tym cŏłkim świycie już siedymdziesiōnt lŏt – coch jŏ jes corŏzki gupszy! A możno inakszij: Kej jŏ sie tak gawca naobkoło, kole mie, to ci sie na isto festelnie dziwuja: pizło mi już te siedymdziesiōnt lŏt, tela żyja we tyj Polsce a jeżech ci sam jesce na isto fŏrt i jednym ciyngiym... normalny! A możno... i niy... ? Bo terŏzki, kej wlejza do szynku, abo kukna do tego łoszkliwego interneca, to kŏżdy gŏdŏ (i gŏdŏł bez łostatnie dwa lata) corŏzki cosik inkszego, a cosik inkszego naszkryflŏł na tych szkartkach łod welōnkōw. To co idzie ujzdrzić we telewizyji, to jes blank co inkszego łod tego, co sam u nŏs na Krojcce, lebo we Piekarach idzie wypokopić na sztrekach. Bo kej czowiek jesce cosik tam poradzi przeczytać, i zmiarkować co przeczytŏł, to ci zarozki mŏ do medikowaniŏ, iże: „Dramatem naszej epoki jest to, że głupota zabrała się do myślenia” – jak to kejsik napisŏł jedyn francuski mōndrok, ftory sie mianowŏł Jean Cocteau. I coby my sam niy gŏdali, coby my sam niy wynokwiali, niy medikowali, prawie miŏł, na isto prŏwda śpiywŏł Andrzej Sikorowski: „Ale to już było I nie wróci więcej. I choć tyle się zdarzyło To do przodu się wyrywa głupie serce. Ale to już było, Znikło gdzieś za nami. Choć w papierach lat przybyło To naprawdę wciąż jesteśmy tacy sami.” Gryfnŏ sam ta śpiywka kapeli „Pod Budom” ze Krakowa, prŏwda? Gryfnŏ, niy gryfnŏ, nale mie pŏra dni tymu nazŏd napasztli kamraty, kerym sie kciało ło naszym Chorzowie dyszkutiyrować. Możno bych sie niy dŏł zmamlasić, keby niy to, co jedyn gorol (niy ze Chorzowa, a ze Poznaniŏ) tela wargowŏł, tela wynokwioł, coch musiŏł na isto cosik ło tyj mojij dziedzinie poczytać, nō i sam napisać (i przeczytać). Mōmy gryfne legyndy, gyszichty sknōłtlowane ze Chorzowym, ze naszym Ślōnskiym i ze tym wszyjskim, co nŏs sam trzimie (na isto, co nŏs sam trzimie?) co niy dozwŏlŏ – nikiej inkszym łoszkliwcōm – wykludzić sie kajsik na tyn ci diosecki „zachōd”, na tyn cŏłki „am Westen”. I chocia nōm sie zdŏ, i co nasze politykery miarkujom, iże my sōm srogŏ „potynga”, to inksze medikujōm, wiedzōm na zicher, iże my sōm richtik sroge, nale to pierōnym srogie angyjbery i tela. Hamerikōny tela miarkujom łō nos, ło Polsce, co ło takij na tyn przikłŏd Kambodży (terŏzki Kampuczy). A u nŏs we Polsce je jedne, je srogŏ zŏwiść. A zŏwiść jes jak gorzŏła: niy idzie łŏnyj pedzieć – styknie, szlus!!! „Elekstryka – kopie, rojmatika – targŏ, a polityka – festelnie capi!!! Tak choby te gōwno, kere sie prziflostrowało do szifa i wrzescy: płynymy!!! |
|
| Strona 1 z 1 | Strefa czasowa UTC+1godz. |
| Powered by phpBB® Forum Software © phpBB Group https://www.phpbb.com/ |
|