| Świętochłowice - Forum bez polityki https://forum.swietochlowice.biz/ |
|
| Spóminki baby szoferoka... https://forum.swietochlowice.biz/viewtopic.php?f=17&t=686 |
Strona 1 z 1 |
| Autor: | Ojgyn z Pnioków [ 05 cze 2016, 8:19 ] |
| Tytuł: | Spóminki baby szoferoka... |
Idzie to tyż posuchać na www.ojgyn.blog.onet.pl Jada se kejsik ze Chorzowa do Poznaniŏ. Na drōdze uwidziałach chopa, ftory chytŏł autoki na „stopa”. Zahaltowałach, a łōn rzōńdzi, iże spiychŏ mu sie do baby do lazarytu nale niy mŏ żŏdnych pijyndzy... a czŏs pili... – Spōmogecie mi paniczko, ja? Nō, zgodziōłach sie, siednōł sie wele mie, sztartłach i napoczli my ze sia łozprawiać. Łod słōwecka do słōwecka wylazuje na to, iże tego istnego dziepiyro co wypuściyli ze heresztu, kaj przetrŏwiōł pŏra lŏt za roztomajte rabsikowanie, gwŏłty i take tam jesce sprŏwki. Zrobiōło sie we mojim autoku miersko, niyprzijymnie, bali napoczłach sie tego istnego bŏć. Nale zaziyrōm na drōga a sam ci jesce jedyn chop, ftory kce łapnōńć tyż na „stopa”. Tōż tyż pomedikowałach, iże tyn drugi przecamć na zicher nic mi niy zrobi łoszkliwego, na łostuda przi świŏdku, posadziōłach tego piyrszego na zadnim kanapyju a tego nowygo wele mie. Nō, i jadymy dalszij... richtōng Poznań. Łozprawiōmy jak skorzij. Nale po jakimsik czasie tyn wele mie wyciōngŏ jakosik legitka, jakosik łodznaka, taki blankycik i gŏdŏ, co łō je policajtym a mie wklupŏł sztrofa, mandat 500,- złocioków i wielaś tam jesce ku tymu pōnktōw. Bo to bezmać przekroczōłach pryndkōść, tela a tela razy prześcignōłach na krajcoku, i cosik tam jesce. Tak ci łōn mie zaskoczōł, iże niywielach myślała i przijynach ta sztrofa wku...nŏ do czerwiōnōści. Pŏra łoka mrzikōw niyskorzij tyn policajt kŏże mi sie wysadzić. Blank nic‘ech sie niy łozwała, wylŏz tam kaj kciŏł a jŏ fōrt i jednym ciyngym szarłatnŏ na fresie pojechałach dalszij. Po niydugim czŏsie tyn istny, kery mie zasztopowŏł skorzij, ze tego zadnigo kanapyju, a ftory blank do terŏzka nic niy gŏdŏł, prosi mie cobych go wyciepła hań tam wele tankszteli. Zahaltowałach, tyn istny wylŏz i na łostatku wyciōngŏ briftasza i dowo mi 500,- złocioków. – Przecamć panoczku, ugŏdalichmy sie nŏjprzōdzij, iże podciepna wŏs za darmo. – rzōńdzi ta baba szoferok. – Blank niy kca waszych pijyndzy! Na to tyn jankorny chop: – Bierōm łōni paniczko, aże bierōm. Bydzie na ta sztrofa kerŏście erbli. – Nale, jakōż to? Gŏdaliście panoczku, iże niy mŏcie blank pijyndzy. Krōm tego, to bōła sztrofa ino dlō mie. Wŏm panoczku nic ku tymu! – Widzōm łōni. Kcieliście paniczko być szmelcich... drugim rada... sprzijaźliwŏ... podwōjzicie czowieka ze dobrygo syrca, a tyn skur...l wypisuje wōm paniczko sztrofa... Nō, toch mu podpier...ōł briftasza! |
|
| Strona 1 z 1 | Strefa czasowa UTC+1godz. |
| Powered by phpBB® Forum Software © phpBB Group https://www.phpbb.com/ |
|