Świętochłowice - Forum bez polityki

Idzie to tyż posuchać na www.ojgyn.blog.onet.pl

Bydzie to na isto wyzwa zdrzałego czowieka, chocia niykōniycznie pynzjōnisty. Wiycie! Świat, moje Wy roztomiyłe modzioki, kejsik ci wyglōndŏł blank inakszij. Niy cuciōła nŏs, terŏźnich szejśćdziesiyciolŏtkōw lebo siedymdziesiyńciolŏtkōw jakosik ci tam telewizyjŏ śniŏdaniowŏ, i beztōż tyż niy wiedzielichmy nic ło istniyniu spaśnych cwergowatych akrōbatkōw, jakisik chippendalesōw (takich, wiycie, chopskich sztriptizyrōw) i roztomajtych kotōw, miauczkōw, kiere poradzōm gŏdać alfabytym Braille'a. Cuciōł nŏs ruski weker, ruski buksiok, kiery blank niy kciŏł fóngować tak, jak tyn hejnŏł ze marijackij wiyży kŏzŏł. Ale jednakowōż poradziyli my sie zwyrtnńć i być na czas we szuli. Na śniŏdanie ćkalichmy klapsznity ze lyjberwusztym, bez świynta ze szinkōm, ftorŏ gerowała już po dwōch dniach. Kyjzy byli, eźli na isto byli, ino dwie: żōłtŏ i biŏłŏ. Miana łōnych byli jednako umōłwne, lipne jak łōnych wert i farba. Żŏdyn tyż niy jŏdŏł jakichsik „lunchōw” – byli druge śniŏdania, take klapsznity gynał, akuratnie zapakōwane bez nasze mamulki we papiōr śniŏdaniowy, ftory poddŏwali niyskorzij dōmowymu „recyklingowi”, i eźli sie niy umarasiōł, wykorzystŏwało sie go drugi, abo i trzeci rōłz.
Jŏdało sie tyż łobiady: kartofle, tuste zōłzy, kotlety; mało ku tymu bōło rybōw i gymizōw. Na nudle gŏdalichmu nudle a niy „pasta”, bo italijōńsko „pasta” to naszŏ śmiyra. Bo śmiyrōm glancowalichmy szczewiki. Żŏdyn tyż ajnfachowy czowiek niy miarkowŏł, co to jes tyn diosecki choresterol i ćkŏł tela jajec, wiela ino poradziōł. A jednakowōż niy umiyralichmy masowo na hercszlagi.
Rechtōr juzaś, kiery poradziōł przimaścić linijŏrzym abo połōmać skaźnik na niyjednyj dupie, kŏzŏł nōm uczyć sie mocki roztomajtych definicyji i wzorōw, i straszōł ci nŏs powtŏrzaniym klasy. Jednako niy mielichmy skuli tego jakijsik „traumy”. Tak prŏwdōm blank niy miarkowalichmy tego łoszkliwego słōwecka ani tyż niy bylichmy pod flyjgōm jakigosik „terapeuty”.
Niy uczylichmy sie ynglickigo i niy deptali my na tyn moderny terŏzki balyt. Coby ugŏdać sie ze kamratōma na fusbalszpil, niy glingalichmy skorzij dō nich ino wkarowalichmy po łōnych do pomiyszkaniŏ, abo wrzescelichmy pod jejich łoknami, coby wylazowali na plac. Niy brōniōł nōm tego żŏdyn ze jakigosik TVN Style abo inksze angyjbery.
We łōnych czasach szajspapir bōł ino we lyjberwuszcie i mortadeli, a pulwer do praniŏ prŏł gynał i biŏłe i farbiste lōnty. Eźli razinku... prŏł. Niy bōło ci tyż krymōw na dziyń, na noc, na zima i na lato. Bōła ino Nivea. Jednakowōż niy capielichmy ani niy umiyrali my na dezynteriŏ, znaczy sie na laksyra.
Bylichmy blank niymōłdnie prziłobleczyni ale udŏwało nōm sie ugŏdać ze dziołchami, kiere – i niy kca sam żŏdnyj cosik przeciepować – blank niy miarkowali fto to jes ta cŏłkŏ Jaga Hupało abo inksze wywołane „stylistki”.
Nasze łojce niy glingali dō nŏs ze mobilniokym i nigdy tyż niy wiedzieli, blank niy miarkowali kaj my sōm. Niy łodwojziyli tyż nŏs autokōma do szuli, łod kedy pizło nōm siedym lŏt, i jakimsik cudym niy umrzili łōni na syrce, a my niy bylichmy łofiarōma pedofilōw ani zeryjnych mordyrzōw, a na blank licho łoznakowanych cestach, na przyjńściach dlŏ piechciŏrzy, niy łozjechali ci nŏs autoki. A przecamć jakesik ci tam wtynczŏs tyż autoki fyrtali.
Nō, i niy knipsowalichmy sie do Naszyj Klasy, ani na tyn Face Book spode tego wywołanego rzymskigo Koloseum ani spode piramidōw. Jejździylichmy za to na roztomajte kolōnie i obozy, ściepowalichmy sie na orynżada we bojtliku, abo brauza we pulwrze i łodpustowe kyjksy. Nō i za zicher niy miarkowali my, co to jes tyn stopierōński „Taniec ze gwiŏzdami”, fto to jes Tusk, Kaczyński, Komorowski i Duda, co tyż to za diosectwo jes ta „emancypacja kobiyt” i jakesik ci tam „prawa gadziny”. My siedymdziesiyńciolŏtki przeżylichmy tyż richticzne piekło. I skuli tego, żōndōm, na isto nastowōm na to, coby dlō nŏs wszyjskich bōła pynzyjŏ... drugij grupy!

_________________
Ojgyn z Pnioków