Idzie to tyż posuchac na
www.ojgyn.blog.onet.plNiydŏwno dzieckōm napoczli sie feryje. I kejsik tak niyskoro na łodwieczerz jedna mamulka kukła do izby swojij ceruszki i ujzdrzała na zofie listecek we ftorym stŏło tak:
Moja roztomiyłŏ Mamulko!
Yntlich mōmy już szlus ze szulōm. Dlō mie już na... zawdy. Łod pierōnym dŏwna przaja jednymu karlusowi i uzdalichmy śniym, co terŏzki już na zicher drapsnymy, pitnymy łod naszych łojcōw. Jŏ miarkuja, iże tobie by sie to niy zdało, ale łōn ci je taki caubrowny, taki szmelcich! Te jejigo wyżgane na ciyle łobrŏzki, te wrajżōne bele kaj piestrzōnki, ringi... A tyn jejigo motorcykel!
Ali (bo tak mianuje sie tyn mōj szac) miyni, iże jazda na tym motorcyklu we chelmisku to stopierōński grzych. Tyn Ali je na mojim pōnkcie do łostatka pofyrtany, blank ferikt. Gŏdŏ, iżech to jŏ go retła, bo tyn ankohol, to by go na zicher na łostatku zakatrupiōł...
Aha..., i nŏjważniyjsze! Bydziesz miała mamulko wnuka! Takŏ jeżech rada! Kamrat mojigo Alego mŏ ci kajsik we lesie maluśkŏ drzewiannŏ chałupka. Jōm ino trza deczko wyrychtować, i niy ma we tyj chałpie ani światła, ani wody, ale to bydzie tyn nasz nowy dōm. I niy trŏp sie mamulko! Bydymy mieli ze czego żyć. Tyn mōj szac Ali mŏ fajnistŏ, wybōrnŏ idyjŏ, szykownisty pomys. Bydymy do kupy uprŏwiać „marihuana” i sprzedŏwać jōm na miyście. Mŏ ci być ze tego pierōńskŏ kupa pijyndzy! Takŏch je ci rada! Ino sie mamulko niy trŏp, prosza! Chnetki już mi piźnie śtyrnŏście lŏt i na isto moga już przecamć dŏwać na sia pozōr. Mōm ino nŏdziyja, iże chnetki wypokopiōm mōndroki jakŏ szczypiōnka na AIDS... Alymu by to festelnie mōgło spōmōc...
Twoja roztomiyło cerzicka!
Aha! Na łostatek! Wszyjsko to sōm mamulko duperszwancwe i belakwastry. Wszysko to je jak wjechać ryczkōm pod łōżko!
Jeżech u Kristy, łoglōndōmy telewizyjŏ, i grōmy na kōmputrze. A jŏ ci kciałach wystawić, iże sōm gorszyjsze zachy niźli tyn mōj cŏjgnist, te moje cynzōrki, ftore znŏjdziesz na mojim nachtiszu! Kusiolki!
Zaloguj się
Zarejestruj się
FAQ
Szukaj
